تييييييييييت

أنا شخص

انا مش شخص انا شئ شارف انه يفقد صفته الادمية

اروح فين واعمل ايه

مفيش حاجة ممكن اعملها

اتزنقت في ركن ضلمة في آخر حارة مسدودة

وصلت لحالة اني مش عارف احكي لحد اي حاجة

مفيش اي حد ممكن اكلمه او اي حد ممكن افضفض ليه

محدش عنده استعداد يسمعن او يستحملني او ياخدني في حضنه

كله نازل ضرب فيا

اصبحت كخيال مآتة في حقل ذرة جاف

تقف الغربان على على كتفيه تنقر في رأسه

نفذ ما في الحقل من ذرة

ولم يبق غير قش رأسه لنصنع منه الاعشاش

فلنحصل عليها ولنفر منا هنا

قرف قرف قرف قرف

مش عارف اعمل حاجة

مفيش حد ممكن استشيره واخد رأيه

مفيش مفيش مفيش

حياة فارغة , , , مفيش حواليا شخص حيادي عاقل اقدر افضفض ليه من غير ما ياخدني على محامل اخرى , و يقدر يفرغ وقت انه يسمعني

تيييييت

تيييييت بجد

استغفر الله العظيم

انا اللي غلطان في الاخر

استاهل ضرب ستين ألف جزمة

كان معكم

جزماتي ابو الجزم

نوم لأكثر من 15 ساعة

بقالي كتير . . . يعني فترة طويلة ببدأ مقالي بكلمة

مش عارف. . . .

امبارح روحت البيت كلمعتاد قعدت , عملت كل المعتاد اللي بعمله , اتغديت كالمعتاد

دخلت اوضتي , حطيت السماعات في وداني عشان مسمعش المناقشات الزبالة اللي بيتكلموا فيها رفقاء السكن معايا و ذلك كلمعتاد.

فضلت صاحي لحد الساعة السادسة مساءً , كنت مخنوق جدا , نمت , تخيل انك تنام مخنوق

نمت . . . نمت كتير , بالصدفة موبايلي كان معمول اهتزاز , من ساعة الاجتماع بتاع النهاردة في الشغل

نمت . . . كل شوية اصحى وانام تاني , مكانش فيه حاجة تدفعني اني اتحرك من تحت البطانية او من فوق المخدة

نمت . . . جه واحد يصحيني عشان العشا , أكل وكدا , على اساس اني عملت مجهود فظيع من الفترة بين الغدا للعشا غير اني نمت , ربما لاحظ اني بجري كتير في احلامي فمحتاج غذا وكدا , يا عيني الواد هفتان.

نمت . . . نمت كتير جدا , وكل ما اصحى الاقي نفسي زهقان و مخنوق , ارجع انام تاني , في مرة منهم صحيت وكنت عطشان , إزازة المية جمبي على الكومود نمت تاني لأني مكسل امد ايدي اشرب منها.

اوووووه

حالة وحشة مش لطيفة بالمرة

:(

صحيت اليوم التالي "النهاردة" الساعة 9 الصبح , خدت دش , فطرت ودخلت على اوضتي , اتلمت الترويكة برا في الصالة عشان يفطروا , وهاتك يا رغي.

اكتر حاجة بكرهها الكدب , معانا واحد منافق , مدلس , ضعيف الشخصية , ميهمهوش غير مصلحته , خنوع تحت اي قوة , ضعيف و مستسلم جدا قدام اي ظلم بل انه بيشترك معاه و يخش جواه و يبقا جزء منه , كان بيتكلم عن العزة و الكرامة و اننا العرب اللي عاملين كدا في نفسنا , وجت سيرة امريكا و السفر في امريكا , و الناس اللي بتسافر وتتمرمغ هناك و اننا لازم يكون لينا كرامة هناك , قولت في نفسي , هي دي شحصية الجاسوس , بس لو اتيحت له الفرصة.

ناهيك عن باقي المواضيع البذيئة , مقدرتش اكمل سمعان القرف دا حطيت السماعات في وداني . . . كلمعتاد

وها أنا ذا جالسا على سرير استمع إلى الموسيقى التصويرية لفيلم "المليونير المتشرد"

كان الله في عون الجميع

وربنا يهديهم

خير خير خير

محدش عارف الخير فين

كان معكم . . . .

فتوح ابو المفاتيح - كالمعتاد

لا شئ . . . العدم

لا موت

لا حياة

مجرد لا شئ

ولا حتى بطيخة طعمها زي الخيار

مجرد عدم ينساب منه دم أسود ببطئ

يطغى على العالم ويحيطه بستار دموي عنيف

يسيل . . . يغرقنا . . . يغطينا

يقتلنا رويدا رويدا

اسوأ و ابشع انواع القتل البطيء

ترى كل شئ حولك يموت

اصابعك فساقاك و تفقد الحركة تماما

تموت ذراعيك , ولا تستطيع ان تحرك ساكنا

ثم يترك جثة هامدة لا حراك فيها

وتعلق لافتة

هنا كانت تنبت نخلة

اصبحت جثة هامدة بلا ثمار

البركة بالأطفال

النهاردة روحت سوق الخضار مع ماما
تقريبا من قبل الصلاة لحد الساعة 3
كان الجو حر خالص جدا أوي وشفت منظر جميل جدا جدا
بنوتة صغنونة . . . عسل أوي , تقريبا 9 سنوات , ماسكة جركن مياه وعمالة تلف على الستات القاعدين اللي بيبعوا خضار وتملى لكل واحدة الإزازة بتاعتها , وأي حد عاوز تشرب تقف تسقيه وتكمل المهمة بتاعتها

كانت ماشية مبسوطة جدا وهي عمالة توزع المياه على الناس
الناس كانوا متقبيلنها بشكل حلو اوي , كانوا مبسوطين منها , ناس مكشرة و متضايقة من الحر لما يشوفوها ينبسطوا ويمدوا ليها الإزازة
جزها الله خيرا على الحاجة الحلوة دي

ساعتها تخيلت موقف حلو خالص

حبيبة -بنتي الحلوة- لما نروح نحج كلنا مع بعض (أبو حبيبة , أم حبيبة , حبيبة), هتلف على الحجاج بمياه زمزم شايلاها بنفسها من الحرم عشان تسقي كل عطشان و إخنا واقفين في يوم عرفة

هييييييه
إن شاء الله خير
بس قولوا يارب و صلوا على سيدنا وسيدكم النبي
اللهم صلي عليك يا نبي

كان معكم منتشيا
فتوح أبو المفاتيح - شاربا شوية مية زي العسل

عيد ميلاد ابو فصادة_كلاكيت تانية مرة

صباحكم فل

كمان ثلاث أيام بتوقيت القاهرة , يحل موعد عيد ميلاد

محمد السجاعي

فتوح ابو المفاتيح

مستر سيجا

محمد ميستر

السنادي عيد ميلادي مختلف , عشان حاجات كتيرة اوي اوي اوي

انا بقيت في مكان مختلف

عايش في مكان تاني , أنا دلوقت بقيت من اهل القاهرة الكبرى

اصحابي اللي من طنطا بقا اتصالي بيهم شبه مقطوع , اللهم إلا عبر الفيس توك و الماسنجر و رنات موبايل متباعدة

مفيش حد اثق فيه واقدر اتكلم معاه بحرية في اي وقت

ناس كنت متعود اتكلم معاهم وبفضفض , أو الصحيح هما اللي كانوا بيفضفضوا معايا , مبقيناش نفضفض

دايرة معارفي وسعت جدا , عرفت ناس جديدة , ناي حلوة بجد , ثقافات جديدة اتعرفت عليها , قفزات هائلة في مستوى الناس اللي اتعرفت عليهم

بمعنى اخر دنيا جديدة

بس انا لوحدى

السنة اللي فاتت في عيد ميلادي اللي فات

اهو فات سنة عليه فنتكلم بصراحة

كتبت لسته من الطلبات , مجاش منها حاجة , هو جالي حاجات آآآه , مثلا محمد عادل جابلي قلم رصاص بسنون وخاف يجيبلي واحد خشب , وجابلي كتاب لا تحزن اللي دلوقت مع جوز اختي

محمد عادل طيب و عاوز ليا الخير , وبيهمه المظهر و بيتأثر بيه أوي (المظهر يعني) , عشان كدا كان مرة خايف عليا من حد ما , لأني بقيت معاه كتير , لأنه شايف انه مظهره مش كويس , و أنا كويس , فمش لازم امشي مع الحد اللي مش كويس , وذكر دا لحد من اصحابي

بس

خير خير خير

السنة اللي فاتت كنت متوقع من ناس كتيرة انهم يجيبوا ليا حاجة , مش لازم من القايمة اللي عاملها , بس حاجة وخلاص , محدش من اللي متوقع منهم جابلي.

لم اهتم بالموضوع دا خالص , بس أكتر حاجة زعلتني أطفالي , بقالهم معايا سنة كاملة , و كونا جروب وكنا فيه اسرة واحدة , وكنت بهتم جدا انهم يعرفوا اعياد ميلاد بعضنا البعض عشان نحتفل بيها , غير كمان علمتهم انهم يرتبوا احتفاليه صغيرة لأي حد بحاجات بسيطة , يوم عيد ميلادي , محدش افتكره , ولا حتى كل سنة وانت طيب , على الرغم انهم عارفينه , يوميها زعلت زعل كبير أوي أوي , وصعبت عليا نفسي جدا , اكتر حاجة بحبها إن حد يهتم بيا , و ميحسسنيش اني نكره , المفروض إني بدي اهتمام و عندي توقع اني الاقي اهتمام , حتى لو بسيط

يويمها كتبت بوست أنا زعلان , واحد صاحبي قال ودا كان عيد ميلاده , بقا يوم ما انا آجي للدنيا انت تزعل الزعل دا كله

خير خير خير

هو انا عيد ميلادي يوم عيد الحب , يعني الهدايا من كل شكل لون متوافرة في المتاجر واللي مش لاقي حاجة طول السنة هيلاقيها في اليوم دا.

السنادي في اليوم دا أنا معزوم على عيد ميلاد مخرجة مسرح عرائس , المفروض ان عيد ميلادها 20\1 بس هي كانت مأجلاه شوية , كنت عملت ليها الجرافيك ديزاين الخاص بمطبوعات آخر مسرحية عرايس بتعملها , وهي شايفة إن نهضة اطفال مصر هتكون على ايديا

:P

السنادي هكتب قايمة تانية من الطلبات , بكتبها دلوقت من مكتبي في الشغل , قاعد ماسك الماج بتاعي ونازل شرب في الكابوتشينو الخصوصي بتاعي اللي بصنعه عمولة (الاسبوع دا بطعم الجزر) طعمه ظريف

سؤال يطرح نفسه على الساحة

هل انا متوقع إن حد يجيبلي هدية عيد ميلاد ؟؟؟

كالمعتاد انا مش بقول لحد على عيد ميلادي لأني شايف ان دا نوع من طلب التماحيك , دا أول هام

تاني هام , مفيش حد أنا اعتقد انه يهمه انه يجيبلي حاجة في عيد ملادي , لأن علاقته معايا علاقة شغل , أو زمالة كويسة , محدش قريب مني عشان يعرف انا بحب ايه ومش بحب ايه

يعني انا مثلا مش بحب التماثيل و الكور الإزاز و الشمع و الانتيكات اللي بتتحط في النيش او على مكتب محدش بيقرب منه والحاجات دي , وشايف انها مش عمليه , وملهاش لازمة في الحياة غير انها تنكسر و نعيط عليها

أما عن أطفالي , فأنا هنا في مصر لسا مكونتش منهم ناس متصلين بيا اوي , ليا اطفال في اسكندرية , بس علاقتهم بيا . . . مش عارف , ممكن نقول عليها علاقة تكافلية , لأن سيجا ليه فايدة , لما تخلص الفايدة يبقا مالوش لازمة .

خير خير خير

نيجي بقا لقايمة الهدايا اللي عاوزها للسنادي

أولا : عاوز دلاية جديدة للموبايل , أخد الحبل بتاعها و احط فيه القلب الفضة اللي في الموبايل بتاعي , لحد ما اديه لخطيبتي ان شاء الله.

ثانيا : عاوز دلاية كمان , بس تكون طويلة , عشان احط فيها الاتنين فلاش ميموري اللي معايا.

ثالثا : عاوز شنطة حلوة خالص لفلتي (فلة دي كاميرتي الفوجي S700) تاخدها هي و الحامل الصغنووون خالص اللي جبتهولها

رابعا : عاوز اقضي ليلة بمركب في وسط النيل كل اللي بعمله ابص للسما , واقول هي فين الشمس يا عمو

خامسا : عاوز كتاب حلو اوي بيتكلم عن الإخراج السينمائي - مش حاجة تانية يا وحسين

سادسا : عاوز شال فلسطيني , مش زي اللي بيتباع على الارصفة , عاوز شال حلو جميل ولطيف وشبه بتوع الفلسطينيين

سابعا : عاوز اكل في مطعم صيني و بالعصيان بقا و نتعك وتبقا هيييصة

ثامنا : عاوز عروسة لعبة , تكون محشية كدا واموورة خالص واسميها حنة

بس كدا وخلاص

كفاية اوي , اكتر من كدا هكون طماااااع

واساسا , لو انا كترت أو قللت مفيش حاجة هتيجي

بس اهو . . . حلاوة نفس

بس خير خير خير

محدش عارف الخير فين

ملحوظة صغوونة كدا في الآخر : المقالة دي سواداوية , لأني مكتأب ومتنكد اليويمن دول , ودماغي فيها مليون كائن فضائي , جم فجأة واحتلوا المكان

بس ان شاءا لله التحرير قريب , يادوب ميكروباص من الدقي وتوصل

خير خير خير

سلاااااااام عليكم

كان معكم لابسا طرطورا

فتوح ابو المفاتيح – ربنا يهديه

كراهية الذات - حين يختلط الفن بالروائح

مش عارف . . . (على فكرة حكاية مش عارف دي كترت معايا) المهم

انا دلوقت جوايا احساس بغيض
امبارح كنت في عالم المفترض انه للمشاهد انه جميل وحاجة كويسة وبيعمل رسالة كويسة وخدمة و مش عارف ايه وحاجات كدا كتير.
ولكن الحقيقة أنه عالم قذر , عالم كريه.
القذارة و الطابع دا اكتسبها ممن كونوه , من الناس اللي هما عناصره و سبب الحركة داخله.
العالم دا عشان تخش فيه , عشان تعرف تتعامل جواه , لازمن تبقى قذر . . . عشان تبقى جزء منه لازم تبقى قذر , لأن دا الطريق السهل.
الله اعلم . . . ربما يوجد اشخاص كويسين جواه . . . ربنا يقويهم.

عالم المسرح
عالم المصالح والضحك في الوش حتى لو كنت بكرهك , ولو كنت بحبك ومليش مصلحة معاك فأنا معرفكش.
التظاهر ومحاولة التشكل , كل واحد بيضحك على كل واحد , مع محاولة الظهور بما هم ليسوا عليه
خير

مسرح روابط . . . مسرح مستقل , لكل واحد معتقد انه بيعرف يمثل ,أو بيعرف يعمل حاجة ليها علاقة بالمسرح.
كان فيه مهرجان اسمه "البقية تأتي" لشباب المخرجين و المخرجات , كان فيه عرض لثلاث مسرحيات.

هلوسة في البوسطة : ودي بتصف واقع مصري عقيم , المخرج نجح في ايصال مشاعر الكراهية و الاحباط و الحقد لدرجة إن الناس اتخنقت وكرهت نفسها , الناس كانت حاسة انه فيه هم كبير طابق على نفسها وظهر بشدة على وجوههم , عشان كدا اعطيته تقدير أحسن أداء.


الممثلة الأساسية بتلعب باليه , عشان كدا المخرج حشر حتة باليه في نص المسرحية.
الفكرة النهائية للمسرحية عن المعاناة المادية بتضظرنا نتخلى عن أحلامنا , وقد تدفعنا للانحلال اللا أخلاقي في النهاية.

مسرحية الدرس : دي بتوصف ايه . . . ؟ المفترض أنها بتنتمي إلى فئة "مسرح العبث" يعني اللي انت عاوز تفهمه ممكن تفهمه , أنا بفترض انها بتتكلم في مبدأ الاختلاف أو لنقل ناس معتقدة إن اللي هي بتعمله صح بينما في الآخر هو خطأ مبين, ودا عشان هما مختلفين و مش فاهمين حاجة.


كان بيغلب عليها طابع الكوميديا و الهلس الكتير.
النقطة المهمة اللي وضحتها المسرحية هي إن الاتصال بين شخصين عبارة عن رسالة من المصدر إلى المستجيب و إن حصل مشكلة فإن المصدر هو اللي غلطان (انت السبب و الحق عليه) وقد يؤدي سوء الاتصال إلى الموت , موت علاقة , موت صداقة , موت حب , عشان سوء اتصال.
الإخراج كان متوسط , بس الديكور كان رائع , عشان كدا اديته تقدير أحسن ديكور.



آخر مسرحية هي البوفيه : الإخراج فيها كان ضعيف , الفكرة وصلت , بس . . . الإحساس كان صعب أوي انه يعدي خشبة المسرح , تحس انه متجمد في الجو ومش عارف يوصل للناس.
هنا المسرحية بتتكلم عن الخوف , و إن احنا شعب مبيجيش غير بالسك على دماغه , أو على رأي المخرج "انه يشرب كركديه سخن" حلوة حكاية الكركديه دي.


إحنا شعب بيحب الهلس , والحاجات اللي ملهاش لازمة , وعشان الفلوس ابيع يا ريس ونشيل ونحط ونزيح ونحرك وكله تمام طالما اني راكب على الكرسي و محدش يحركني من عليه.
قاعد على الكرسي , كل الناس رهن إشارتي طالما اني متحكم في البوفيه , ونقدر نخليك تشرب اللي احنا عاوزينه.
اسلوب الإضائة وتوزيعها كان اكثر من مبدع , لدرجة انه غطى على الديكور اللي كان بسيط اوي.
العرض دا منحته تقدير أحسن توزيع إضائة.



المكان في روابط محبط سببه شاغلي المكان , القذارة أو لنقل الحقارة و المهانة في التعامل اللي بتكلم عليها بتنبع من عمار المكان , الناس اللي بتتحرك جواه.
حسيت هناك إني مخنوق , مش قادر آخد نفسي , مش عارف اتكلم , فقدت النطق من كم الروائح العطنة التي زكمت الأنوف , وأعتقد انها انفي وحدي التي زكمت.
أحد اعتقاداتي إن كل سلوك شاذ أو منافي للعقل و الأخلاق , ليه رائحة تتوقف وحاشتها (قبحها) على مدى سوء هذا الخلق.
كل انواع الروائح ظهرت , تحس إنها بتركب على صدرك , تحرم عليك التنفس والرؤية , وقد تصل انها تسيل الدموع.
وحتى تتعامل مع المحيط , لازمن ولابد انك تنخرط فيه.
لازم تتعامل زي ما بيتعاملوا.
لازم تتشبه بيهم . . . تعمل زي ما الناس بتعمل(في اعتقادهم) وغيرهم.
لا حياء , أو زي ما اتقال (الحياء هو الحب المفقود).
تحس وانت هناك انك شيطآن أخرس.
ماهو أنت ساكت على الحق.
وجودك هناك يعني رضاك عما يحدث.
خلصت الثلاث مسرحيات و ابتعدت بأسرع ما يمكن , امشي في هواء القاهرة الليلي , عساي اتخلص من هذه الروائح.
تخلصت من رؤيتها , لكن . . . مازالت عالقة في ذاكرتي . . . تبكيني و تؤسيني – تزعلني يعني.
ليه كدا ؟ ؟ ؟
ليه شذوذ البعض بيدفع الكل لهذا؟؟؟
هل لأنهم هم المتحكمين في البوفيه.
هل هذا هو الفن
آ آ آ آ ه
كم من الجرائم ترتكب يوميا بأسمك
خير
يارب اهدي يارب

نسيت . . . عشان برضه عمار المكان ميعتقدوش قدام نفسهم انهم مقصرين في أي حاجة و أنهم عداهم العيب و أزح . . . وقوفوا دقيقة (في الحقيقة 30 ثانية) حداد على ضحايا غزة . . . و آ آ آ ه يا غزة.
وبيهنوا بعض بالوقفة دي بعد ما وقفوا.
كم من الجرائم ترتكب بأسمك يا فلسطين.

كان معكم مختنقاً
فتوح ابو المفاتيح – مسرح روابط – وسط البلد